財爺不理民間苦　何有顏面見屈原

五月五，扒龍船。今個端午節，基層一肚氣，一嚟眼見高官權貴貪得無厭，家住豪宅仲要瘋狂建，棲身蝸居嘅房奴蟻族唔火滾就假；二嚟通脹肆虐，民生艱困，百物騰貴，愈嚟愈難頂。之但係寄望班官僚幫手抗擊通脹咩，個個又變晒梘水糭咁一舊飯郁都唔郁，真係激到人吹鬚睩眼！

端午節本意係紀念憂國憂民嘅愛國大詩人屈原，計太一叮話齋，呢個日子絕對係向特區庸官抗議示威嘅最佳良機。一則有屈夫子珠玉在前，一經比照，當今官僚無能兼無品嘅醜陋面目更加樣衰突出自慚形穢；二則咯喎，港府高層最鍾意亮相一年一度龍舟競賽扮親民，揀呢個時候向佢哋示威贈興，百發百中例無虛發。呢嗱，今年輪到財爺曾俊華中招嘞。

鬍鬚曾尋日一現身大埔海濱公園，場內即時人聲雷動，多個政黨列隊招呼佢，主要抗議佢兩件衰嘢。第一件，前政府資訊科技總監葛輝踢爆佢政治干預「上網學習支援計劃」招標程序，但係鬍鬚曾竟然以撞期為由缺席立法會今日嘅有關會議，相當之有膽怯嘅味道。於是咯喎，示威者向鬍鬚曾遞送鹹肉糭，諷刺佢「無種」！

政黨抗議鬍鬚曾嘅第二件衰嘢，係要佢盡快派發六千蚊，速速磅，唔好兩頭望！嗱嗱嗱，鬍鬚曾有冇使奸招左右「網援」計劃招標程序，要經過調查至能真相大白，但係派錢失職呢個罪名就唔使審嘞。派錢六千蚊嘅承諾三月初公布之後，至今音信杳然，到底幾時派、點樣派，好醜都應該有個官方答案吖。端午節都過咗嘞，咁等法，升斗市民睇怕望穿秋水等到中秋重陽都無結果。

鬍鬚曾月進斗金，家住壽臣山官邸，梗係唔知米貴啦。通脹逼人，尤其食物價格不斷飆升，對基層生活影響尤甚，以傳統蛋黃鹹肉糭為例吖，今年就加價近一成。鬍鬚曾唔好又同大家講，我唔鍾意食鹹蛋豬肉，亦唔鍾意食，所以唔知價錢呀，下次出街隨時被人掟糭o架！

鬍鬚曾貴為財爺，雖則話唔鍾意食粟米斑塊飯，對民間疾苦唔會有切膚之痛啫，但係逗得公帑受得公家糧餉，就應該學習離騷詩人屈原憂國憂民，為基層扶貧解困。通脹不斷升溫，六千蚊派得愈遲作用就愈細，橫掂都係派，點解左拖右拖？無謂要市民由滿懷希望變成等到絕望吖，唔係第日點有面目去見屈詩人呀？

太一叮呢番苦口婆心，睇嚟鬍鬚曾都係唔會受落o架嘞，佢觀賞完龍舟賽就拍拍屁股走人，唔肯回答記者幾時派六千蚊，更加唔肯收下示威者嘅，以行動證明佢真係好無種。既然鬍鬚曾冥頑不靈，不如索性改名，就叫「飯糭曾」啦！叮！