政情：人民力量六四籌款掀舌戰
上個禮拜六支聯會喺維園舉辦六四燭光晚會，大會話有十五萬人參加。咁多人現身，難怪唔少組織都喺現場擺檔籌款。不過，嗰啲並非主辦單位嘅團體，分分鐘係非法籌款，人民力量成員就因為呢個問題意見紛紜，仲喺網上激辯添！
話說街工依舊會將燭光晚會上籌得嘅十分一善款捐畀支聯會，呢個做法曝光後，人民力量嘅擁躉隨即喺社交網站facebook展開爭論，質疑人民力量籌得嘅善款使唔使交畀支聯會呢？喺fb上，一派贊成，一派反對，眾人愈來愈有火藥味。
支聯會副主席蔡耀昌話佢哋對其他團體喺晚會上籌款，採取「唔反對亦唔鼓勵」嘅態度，但佢哋亦冇要求嗰啲團體上繳，當然有團體願意無條件捐錢，佢哋無任歡迎啦。