政情：搞搞政：飲食猛人挑戰肥仔張議席

盤據立法會飲食界功能界別議席多年嘅「肥仔張」張宇人，下屆選舉或有人同佢對撼喎！

自從日本核災難爆發後，本港嘅日式食肆生意大受打擊，肥仔張即帶成班議員到日式食肆擦餐勁，大派定心丸，又同政府周旋，要求盡快重新啟動中小企信貸計劃幫食肆救亡。另一邊廂，有廠商會喺背後撐腰嘅香港餐飲聯業協會會長黃家和亦動作多多，月前以香港食品委員會主席身份代表業界，向工貿署申請二百萬元支援基金，同廠商會及日本駐港總領事館等單位合作，大搞一系列活動撐日食，姿態絕不比肥仔張遜色，難怪政圈傳佢將代表廠商會披甲上陣挑戰肥仔張。

我哋日前問過黃家和，佢直認有業界希望佢參選立法會，但就話目前距離選舉尚早，仲未拍板會否去馬。黃家和坦言，自己本身做開生意，能否妥善分配時間搞好盤生意同家庭係佢首要考慮，亦要諗吓參選係咪真係有意義。佢又話近十年已積極參與好多同飲食業界有關嘅公職，喺唔同渠道表達意見喎。