馬會義工隊尋日喺青衣舉行端午萬歲宴，同區內逾七百名長者歡度佳節。萬歲宴有個包糉環節，馬會行政總裁應家柏即場同長者合作包糉，雖然包糉係中國傳統，但作為外籍人士嘅應家柏一樣搞掂，佢跟住婆婆嘅指導，快手快腳就將米同豬肉等材料放入糉葉內，話咁快就完成，連婆婆都讚佢好嘢。包完糉後，應家柏得悉現場有位一百零一歲高齡嘅婆婆，於是將手上隻糉送到婆婆手中。呢位婆婆好健壯，連番講多謝，而應家柏就讚婆婆好精靈，仲話完全估唔到婆婆有一百零一歲喎。
應家柏聽從婆婆嘅指導，話咁快就包好隻糉。 （馬會提供）
