政情：醜聞日捱插孖曾鬥甩底

呢排政府醜聞罄竹難書，例如包括煲呔曾在內多名高官捲入僭建風暴，繼而係前政府資訊科技總監葛輝爆大鑊，指摘政府涉嫌向友好嘅建制派輸送利益，而今日立法會相關嘅事務委員會就會討論葛輝事件，相信又有新料爆，可能愈揭愈臭，而聽日就更加係政府嘅醜聞日。

話聽日係政府嘅醜聞日絕對冇誇張，事關聽日立法會嘅大會上，六題口頭質詢當中，有四條都係針對政府近期嘅醜聞，好似謝偉俊會問僭建問題、劉慧卿就問葛輝事件、甘乃威接力問點派六千蚊，再嚟仲有林大輝問港珠澳大橋環評報告輸官司事件。

署男蘇錦樑淪箭靶

如果大家心水清，一睇就知呢四個質詢係對正煲呔曾同佢嘅「真兄弟」鬍鬚曾，正所謂冤有頭債有主，搵孖曾去議事廳度解畫就最直接不過，之但係由邊個官上立法會，係政府內部揀，根本唔到議員話事，依家搵咗發展局、商務及經濟發展局、財經事務及庫務局、環境局同運輸及房屋局等五個局嚟拆掂佢，都冇話唔得嘅，但最弔詭嘅係，呢個政府出名係上樑不正下樑歪，司長唔到，局長一樣可以甩底，搞到四條蘇州屎，有三條要搵副局長嚟頂！即係硬食喇！

財經事務及庫務局局長陳家強同環境局局長邱騰華都飛咗去外地，一個帶團去歐洲訪問，一個就同業界去北京睇環保展覽會，剩番佢哋個副局梁鳳儀同潘潔嚟撐場。商務及經濟發展局就唔使講，個局根本就冇局長，依然都係由蘇錦樑署任睇檔。

呢班副局聽日坐喺議事廳肯定畀班議員狂插，真係唔知佢哋頂唔頂得住？但又可以點吖，惡啃都要啃啦！