政情：搞搞政：幾萬蚊拆僭建 孫公破財擋災

教育局局長孫明揚今年運勢好麻麻，先係身體出事，近排又被踢爆做緊房屋高官嘅時候居所僭建，仲懶理屬下部門嘅執法通知，搞到被人嗌落台。尋日佢出席一個電台節目時，重申會承擔住所僭建嘅所有責任同後果。我哋聽孫太講，佢哋最少要花幾萬蚊拆僭建，唔知破咗財擋唔擋到孫公嘅災呢？

孫公呢排三次回應僭建問題，每次都話會承擔責任同後果，講得決斷，拆僭建亦好決絕。日前，見到孫太去中環太子大廈間「惠記珠寶」睇貨，問起佢拆卸工程進行成點，佢話工程人員現正清拆屋外僭建物，幸好沙塵唔係太大，對養病中嘅孫公冇乜影響。

不過，拆除僭建物後要鋪番啲地磚，之後又要上番油漆，預計工程至少搞一個月。埋單計數「科水」幾多呢？孫太就話未收到張帳單，總之使幾萬元一定冇走雞！破財幾萬都好肉赤噃，孫太聞言好豁達咁話：「冇所謂啦，拆咗先！」佢跟住又話「好多人買樓，都唔知上手或者再上手業主僭建過啲乜，總之人人自危啦！」