政情：范太摸黑快閃收口
城中熱話各位疑似特首參選人動向，尋日撞正「六四」呢個敏感日子，全國人大常委范徐麗泰照樣出席「健康快車」一個慈善活動，結果引嚟大批傳媒到場守候。佢早前大講二十三條，一眾行家都想睇吓佢對「六四」有冇乜嘢講法，點知大會有個環節係「夜光龍」嘅節目，當時全場一片黑暗，到一分鐘後恢復光亮，范太卻冇咗影，原來摸黑快閃咗。
范太尋日以一身黑色西裝褸配黑色西褲嘅打扮出席活動，抵埗後，一早透過工作人員話唔會接受訪問，但傳媒卻一於等，正當大家擁上主禮台前之際，全場卻突然一黑，原來大會安排咗一條螢光彩龍出來表演。一分鐘後，全場再度光猛，但主禮嘅范太已經消失得無影無蹤，大家都畀呢個情形嚇到呆晒，勢估唔到范太竟然好似魔法幻影咁消失咗。
范徐麗泰