政情：鬍顟曾難逃公審

政府前資訊科技總監葛輝爆政治干預招標工作內幕，掀起官場另一輪風暴，焦點人物除咗有商務及經濟發展局常秘謝曼怡之外，仲有財政司司長鬍鬚曾，立法會已經決定禮拜二(七日)召開資訊科技及廣播事務委員會特別會議審呢件事，但係鬍鬚曾就話唔得閒出席，好似想繞道避開立法會公審咁。不過，立法會議員唔肯放過佢，一知道佢就到時間出席委員會喺十三日嘅例行會議時，即刻做好清空當日一切議程嘅準備，一於騰空個衙門公堂，專門伺候鬍鬚曾。

呢單「上網學習支援計劃」招標醜聞，已經搞到政圈充滿緊張氣氛，嚟緊禮拜二，立法會嘅特別會議就召咗事件中幾位主角，包括爆大鑊嘅葛輝、署理商務及經濟發展局局長蘇錦樑，同事件焦點謝曼怡出席，唯獨被指係幕後施壓黑手嘅鬍鬚曾就以撞會為由拒絕出席，唔少議員都對鬍鬚曾冇影好不滿。

分分鐘長過兩粒鐘

不過，俗語話避得一時唔避得一世，我哋尋日收到消息，資訊科技及廣播事務委員會嚟緊十三日仲有一個例行會議，其中一個議程就係預咗半個鐘傾上網學習單嘢，避過七日特別會議嘅鬍鬚曾，今次再冇藉口，好可能要出席十三日呢個會。

有啲人可能以為十三日會議有好多議程，傾上網學習最多都係半個鐘至九個字啫，點都比兩個幾鐘嘅特別會議好啲。不過你有張良計、我有過牆梯，據講立法會方面決定踢走十三日嘅其他議程，專門招呼鬍鬚曾，到時鬍鬚曾面對嘅公審分分鐘長過兩個幾鐘都似，真係坐針氈都冇咁辛苦，唔知鬍鬚曾家吓會唔會悔不當初呢？