政情：四叔唔玩新股一味增持

近期股市非常波動，恒地主席李兆基（四叔）動作都唔少，冇停手增持恒地股份，但向來鍾意認購新股嘅佢就好似唔見影。四叔話，增持恒地股份係因為抵，至於冇玩新股則因為賺嘅利潤唔多。

佢跟住好細心咁以佢自己嘅方式為恒地「估值」，佢話恒地所持煤氣公司嘅價值已經500億元，恒地本身租務組合計同租金回報，又值過千億元，當中仲未計集團所持嘅新界農地同舊樓重建項目嘅潛在價值，仲話如果恒地喺港九市區數以十計嘅舊樓重建項目都順利落實，當中隨時可提供300萬呎可建樓面，如果呎價平均可以做到萬五至兩萬蚊一呎，隨時又值另外400億至600億元，所以實在係好有價值嘅投資，並笑言自己有銀紙就會再買多啲恒地嘅股份。