政情：首部港產Android手機面世

潮流興智能手機。本港有公司自行開發Android手機，仲已經開始付運去意大利，今年手機付運目標達10萬部，生產商幻音數碼主席廖家俊（Jack）尋日透露，呢款「Made in HK」嘅手機當然喺香港都有得賣，仲叫大家支持吓本地貨，希望每個港人都有一部土產手機。

幻音數碼尋日轉主板，阿Jack話佢哋上市編號係1822，希望公司都好似18、22歲嘅後生仔咁年輕有活力。唔講唔知，幻音數碼係首間成功推出Android產品嘅港企，仲得過創新科技產品大獎添。

公司今年仲會推出第二個招牌產品叫心跳監測器，阿Jack話用咗兩年幾去研發，最特別係耳機有內置紅外線，可以喺運動嘅時候按一下量度心跳。佢話原本以為呢個設計唔可行，但最後都成功咗，仲接到美國定單，今年第三季推出，最令佢開心係呢個產品嘅盒會印上「此技術來自香港」，係前無古人嘅做法，所以特別自豪。