政情：搞搞政：陳維安再孭飛難寄厚望
政府同教科書商就分拆教材問題過招，教育局日前由局長孫明揚祭出招標嘅撒手鐧，尋日更宣布成立「學與教資源檢討工作小組」，仲搵嚟副局長陳維安擔正做主席。陳維安喺分拆問題前期已經同書商鬧得好唔愉快，搞電子教科書又一鑊粥，今次再孭呢個棘手任務，會唔會因「書」成「輸」㗎？
不過，教育局推行呢項工作嘅部署都好縮骨，事關呢個小組話到明探討同檢視「課本、教材及學材分拆訂價」政策所引伸嘅問題，內容大包圍，涵蓋相當廣，講到尾，個小組即使最後搞唔掂教材分拆，都唔使畀人抽秤貨不對辦，陳維安又唔怕交唔到貨。
睇番陳維安嘅戰績，○八年領導「課本及電子學習資源發展專責小組」，本來係研究透過推行電子書減低書價，但搞咗兩年幾，結果都係得個吉，今次又領導小組，幾多人會寄以厚望呀？