政情：范鴻齡提起公職怕怕
端午節來臨，打工仔有幾日假，唔少人又諗住外遊，尋日喺香港會所出面撞到范鴻齡，問到呢個前任「公職王」范鴻齡（Henry）有乜外遊大計，佢話嚟緊端午節繼續留港消費，今年農曆新年，Henry一度打算去埃及旅行，最終冇成行，因而避過當地嘅動亂，不過，事件亦搞到佢依家都冇乜外遊意欲。
辭任中信泰富董事總經理已經有兩年嘅Henry，會唔會考慮復出或搵啲公職做吓呢？原本笑意盈盈嘅佢一聽到呢個問題，忽然變得心事重重，話呢樣嘢唔會再諗，亦唔想再講。睇嚟佢當年離開中信泰富嘅心結，至今仍未能釋懷。