政情：白鴿仔出書紀念華叔
「六四」二十二周年來臨，今年再冇多年主持大局嘅司徒華坐鎮，不過，一班同佢相交數十載嘅白鴿黨人，就出版咗本名為《功成必有你在》嘅新書紀念華叔，書中有三十個華叔嘅戰友撰文，齊齊回憶華叔。
李華明話二十年前參加立法局地區直選時，仲係新丁一名，知名度極低，華叔就叫肥仔明淡定啲，好似老竇帶住個仔拉票咁。阿涂就分享舊事，寫番當年范徐麗泰同黃宏發爭立法會主席嘅事，指當年支持黃宏發畀華叔鬧，話佢唔應輕言，因華叔認為適當嘅狙擊更有用。
華叔又經常送墨寶畀黨友，曾經寫過文天祥《正氣歌》詩句賀何俊仁律師樓開幕，而「阿牛」曾健成當年仲係黨員時，華叔都有為佢嘅議員辦事處開幕揮筆㗎。想睇華叔嘅墨寶，即日起至今個月底，可以去石硤尾賽馬會創意藝術中心七樓。
紀念華叔嘅《功成必有你在》新書尋日出版。