政情：周一鑊騎劫食安專家

台灣食品受塑化劑污染嘅風波愈鬧愈大，早兩日仲翹埋手懶理嘅食物及衞生局局長周一鑊，尋日忽然轉軚，話會將塑化劑列入食物恒常監察機制，推翻早兩日仲死撐唔使列入監察嘅說法。大家千祈唔好以為周一鑊今次自摑係有勇氣認錯，事關有人使橫手阻撓食物安全專家委員會前晚開會後公布相關決定，以營造政府聆聽民意嘅效果。不過，佢嘅前倨後恭，一樣暴露咗衞生部門後知後覺、毫無危機感嘅醜態！

禮拜三立法會開大會時，唔少議員都憂慮台灣食品畀塑化劑污染同唔少食品已登陸香港呢件事，紛紛質詢當局會唔會將塑化劑列入食物恒常監察機制，當時周一鑊好輕視件事，話塑化劑根本唔應該存在喺食物裏面，一口拒絕將呢種物質列入食安部門監察機制。

食安委員會延後發聲明

事隔一日，塑化劑污染食品風波再升級，藥物亦受影響，本港食物安全專家開會，事後有消息話，會由主席關海山發稿公布決定。據悉，委員會當時已認為事態好嚴重，雖然世衞同世界糧農組織都唔批准將塑化劑添加到食物中，但係塑化劑卻可能會透過食物包裝物料或喉管等環境污染渠道，令食物受污染，所以佢哋有共識將塑化劑列入恒常監測中。可惜，到夜後都未見委員會公布決定。

點知第朝早，周一鑊喺十點鐘左近已急急宣布喺食物恒常監察中睇埋塑化劑，由佢上演一幕今日嘅我推翻尋日嘅我，好過畀專家推翻佢日前嘅表態啦！兩個幾鐘後，至輪到食安專家委員會發布聲明。就係咁，周一鑊成功騎劫咗食安專家嘅決定，不過，醜事又點會冇人知呢？