短打長擊：分拆雷聲大 減價雨點小

教科書分拆未解決！新學年教科書書價曝光，書商只將小部分新版教科書與教材分拆出售，但分拆又如何？有的只減雞碎咁大把，甚至冇減價。教育局分拆雷聲大，書商減價雨點小，你話教育局顏面何存，如何向家長交代？

教育局局長孫明揚早前說自己對監管直資學校「冇牙力」，如今被僭建醜聞纏身，卻來一個鯉魚翻身，忽然對書商發出訓斥，如果書商一年後仍然拒絕將教材分拆定價，教育局到時就會招標出版課本及教材，為市場引入競爭。

教育局班高官以為將教材分拆就可以降低課本價格，其實只係一廂情願。事實上，本港教科書市場簡直係畸形，學校揀書唔問價，家長只出錢無權揀書，定價大權完全在書商手上，說加價就加價，政府反而要低聲下氣要求「合作」。

如今教育局大發官威，好像是為家長做嘢，而早前亦叫學校不可接受及不應向出版社索取課本教師用書、教材和學材，以及不可接受課本出版商及課本零售商的任何捐贈或其他形式的利益！教育局忽然正義成咁，希望佢哋能夠硬到底，唔好再令市民失望。

教育局更建議教師運用專業知識，自行編訂或挑選其他教學材料，以切合學生的需要。然而，能做到的只是極少數，皆因教育政策朝令夕改，新高中課程淨係科「通識」都畀佢玩到反肚！教育局高官就話「夜洗肚日上班」，偶爾在議事堂釣吓魚都冇乜所謂啫；教師夜晚改簿改卷備課，日間既要教書又要做行政工作，仲會有力自編教材？咪玩啦！