洋務工會尋日搞九十周年會慶，請咗全國人大常委范徐麗泰同行政會議召集人CY梁振英同台做主禮嘉賓。兩個疑似特首候選人碰頭，仲要被安排坐埋一齊，CY惟有擰轉面唔望范太，全程零交流。
被問到對僭建風波有乜睇法時，范太話香港位置高嘅公眾人物要比一般人更加小心、更加要守法。相反，CY就避談所有具爭議嘅話題。問佢點睇煲呔曾祖屋僭建，佢就話唔講；問點睇范太早前講下屆特首要面對為《基本法》第二十三條立法問題，佢更加踢個波畀范太話︰「請范太繼續（講）啦！」把口撬極都唔開。
范太同CY一齊坐，但冇乜交流。
