政情：搞搞政：神秘人狙擊哪吒
十一月六日就係區議會選舉，退出富貴黨嘅西貢區議員「哪吒」方國珊聲稱畀人狙擊。
住喺日出康城嘅哪吒話，尋日有人冒認係買家打電話畀地產代理，指定要買哪吒住緊嘅單位，仲話係佢嘅傾慕者，知佢喺西貢、清水灣有好多物業，喺九龍塘又有大屋，但都想買間屋送畀佢，畀個意外驚喜佢。
地產代理覺得件事好奇怪，因為好少有客指明要買某個單位，個單位仲要係冇放盤。不過，因為哪吒只係租客，代理就打電話畀單位業主劉太。劉太係哪吒嘅好朋友，見佢有心喺地區發展先友情價租個單位畀佢，知道件事後梗係即刻話畀佢知啦。
佢話知道富貴黨都會派人參選區議會，而早幾年喺博康邨參選過嘅張志董亦會參選，尋日件事其實係有人想查家宅，藉詞佢唔係嗰區業主踢佢走喎。佢畀呢件事搞到冇覺好瞓，仲話覺得成件事係政治迫害。
設計圖片