政情：搞搞政：煲呔曾僭建扯到六四？
日前本報揭發煲呔曾喺麥當勞道碧雲樓祖屋露台僭建玻璃窗後，佢一直死撐話僭建未必違規，但屋宇署尋日發表聲明，表示會向煲呔曾發出勸喻信，要求佢自行清拆上述僭建物，或者聘請認可人士證明有關僭建符合法例要求，而煲呔曾亦發聲明話會清拆有關僭建物。煲呔曾知法犯法，祖屋「不保」之餘，同一大廈都有多個單位有類似僭建問題，睇怕都難逃清拆命運，呢次煲呔曾簡直係累街坊，班街坊啲清拆費入埋佢數都不為過。
佢間祖屋嘅地址係「麥當勞道六十四號」，有網民尋日就喺討論區惡搞，將佢改為「勿當奴 悼六四」，認真啜核；有網民更留言話呢個地址好耐人尋味，可能係暗暗向大家發出六四呼聲，仲話愈來愈相信煲呔曾係民主無間道喎！
設計圖片