政情：愛女請病假范太被抹黑
初生嬰兒深切治療病房（NICU）人手嚴重不足係人都知，全國人大常委范徐麗泰嘅愛女范凌華喺伊利沙伯醫院NICU做醫生，早前就係因為工作過勞告咗一個月病假，不過佢嘅同事可能做到火滾，來電本報投訴，話范凌華放假唔使交請假紙，質疑全國人大常委個女有特權。
范太聽到呢個傳聞就火滾，佢尋日唔喺香港，但就透過發言人話自己只係醫生嘅媽媽，從來冇運用過乜嘢影響力，而女兒一直都盡忠職守。佢仲話女兒因工作過勞病咗，告咗一個月假，但依足手續向直屬上司告假，放完假返工就即刻向上司交假紙。
范太希望社會唔好發放呢啲搞特權嘅流言，打擊青年埋頭為自己嘅專業而努力。