政情：高達抽水轉軚查葛輝

近日有關「上網學習支援計劃」招標羅生門愈搞愈大鑊，前政府資訊科技總監葛輝日前仲公開誓章，力證自己對政府嘅指控真確無誤，擺明同政府反枱，立法會動用「尚方寶劍」特權法調查事件更近乎勢在必行。今屆立法會似乎對特權法情有獨鍾，繼雷曼同梁展文事件後，咁快又搞單葛輝出嚟。

調查梁展文事件嘅專責委員會經過歷時兩年嘅努力，終於喺去年尾公開調查報告。身為委員會主席嘅白鴿黨「高達」李永達當時曾呻過，調查梁展文事件真係做到嘔晒血，仲聲言經過梁展文事件後，已得到黨批准「終身免役」，唔使再加入任何專責委員會。

不過，尋日高達講起立法會有可能要用特權法查葛輝事件時，依然講到眉飛色舞，仲話雖然有黨嘅「免死金牌」，佢依然唔介意再加入調查葛輝事件嘅委員會，又拉埋黨友劉慧卿落水，話有佢喺委員會度，佢嘅工作量唔會太重喎。

選舉前出報告博搶票

其實「葛輝事件」擺明係朝住財政司司長曾俊華、商務及經濟發展局，甚至係白鴿黨嘅死對頭建仔而嚟，高達加入委員會徹查事件，固然有望攞分。加上調查過程隨時一拖拖成年，報告分分鐘喺立法會明年選舉前出籠，有水抽之餘，隨時仲能抽走建仔唔少選票，葛輝呢單嘢可謂肥肉在前，難怪高達唔嫁又嫁。

查實自僭建風暴席捲全城後，高達經已成為鬧爆僭建者嘅發言人，幾乎日日都喺電視度見到佢痛斥僭建嘅高官同議員。呢場風暴睇嚟有排都未平息，高達咁忙於打僭建，究竟佢有冇咁多時間查葛輝㗎？