政情：譚Sir是非多賴選舉帶挈

近排建仔是非不絕，先係捲入僭建風暴，被嘲為「僭建聯」，黨主席譚耀宗要求黨內嘅立法會議員檢視自己間屋，確保冇僭建；話口未完，是非燒到佢自己身上，佢被揭發濫用公帑，印咗一百萬個利是封嚟派街坊。最新嘅發展係佢被人質疑早年做僱員再培訓局主席時明益自己友，使橫手畀佢做主席嘅香港專業進修學校為再培訓局辦課程。

睇嚟譚Sir都好頭痕，但佢尋日即時發揮阿Q精神，話呢個係選舉臨近嘅自然現象喎。由九十年代至今都係港專校董主席嘅佢，喺九七至○五年做再培訓局主席八年咁長，最近畀人大翻舊帳，佢就誓神劈願話自己冇負責審批課程，仲拉職工盟落水，話職工盟為培訓局辦嘅課程仲多。都係嗰句，做人行得正企得正，咪乜嘢是非都冇有怕囉！