政情：黎年玩大咗燒埋煲呔曾
申訴專員公署喺月前發表報告，炮轟屋宇署同地政總署放生村屋僭建，隨即捲起「僭建風暴」。申訴專員黎年本身只想向村屋開刀，點知就誤中副車，順手拆埋上司煲呔曾嘅玻璃窗。
煲呔曾尋日聲稱，屋宇署喺○六年曾發信要求佢清拆單位外嘅簷篷同窗外花架，佢亦即時拆除，但對同樣係違法嘅圍封玻璃卻視而不見，企圖博大霧蒙混過關。咁啱得咁蹺，同樣捲入僭建風暴嘅教育局局長孫明揚，亦曾講過屋宇署喺○六年發信要求佢清理僭建物，但佢就冇理到。當時屋宇署隸屬房屋及規劃地政局，而當時該局常任秘書長正係梁展文，真係夾都冇咁啱。
