政情：瑞豐石化晚會星光熠熠
基金老友早幾日去咗瑞豐石化喺佛山嘅新廠房參觀，返港後好似個小粉絲咁話見到佢偶像譚詠麟喺瑞豐嘅晚會唱歌，真係喜出望外，原來成班藝人同港交所前行政總裁周文耀，嗰晚係畀面瑞豐主席余允抗同執董余維強而出席。
余允抗以前做過電影導演，同演藝界交情不淺，所以請得郁「譚校長」。據聞佢以前好少出席呢類Show，今次好抵得諗，聽講只收友情價，老友話嗰晚最鍾意佢唱嘅《一生中最愛》，唱慢歌都幾乎唱爆喇叭，功力認真深厚。其他同場藝人仲有關楚耀、周麗淇同馬浚偉，司儀陣容都好強，有曾志偉同安德尊。
老友話晚會有千幾人參加，當中六十個係基金經理、證券界代表，瑞豐請嘅客戶有近千人，場面真係非常熱鬧，大家都好High。