政情：搞搞政：孫公護副局甘淪遮醜布

教育局局長孫明揚呢排頭頭碰着黑，繼捲入僭建風波後，連老本行都搞到「條條fing」。講嘅係教科書課本同教材分拆定價問題，本來由副局長陳維安擔大旗，可惜搞足兩年都係得個吉，既擺唔平書商，又冧唔掂學校，最後都係由孫公親自出嚟收拾殘局。

孫公尋日開記招公布市場只有百分之八新版教科書嘅教材進行分拆定價，呢張成績表，絕對係肥佬！跟住佢係威係勢咁兇班書商，而喺成場記招，陳維安就坐埋一邊尷尬陪笑。

問孫公點解攞番件事上身做，同埋覺得陳維安表現值幾多分？佢話：「好多嘢，係副局做幕後，我負責講。」跟住又話：「總言之，副局用兩年嘅經驗同我分析，否則我邊有咁快上手呢，好似睇吓點樣同書商擺姿態，我哋上下齊心正視問題，又例如同書商擺乜姿態？唔存在副局有乜問題，佢已經盡心盡力。」至於陳維安有幾多分，孫公話呢個分數應該由公眾畀。

孫公講到要擺姿態，表面上當然係要書商就範，暗地裏似係幫陳維安遮醜多啲喎！