政情：碧桂園三小姐獲委執董
一向家族管理色彩極為鮮明嘅內地發展商碧桂園，尋日宣布即日委任老闆楊國強嘅三女楊子瑩做執行董事。
三小姐依家主要負責公司嘅財務，包括境外同境內融資，前途好唔在講，睇通告話佢嘅基本年薪就已經有成一百三十萬元人民幣，仲有其他附加福利，同埋年終管理花紅。
同啱啱當選胡潤「少壯派富豪榜」第二位嘅姐姐楊惠妍一樣，楊子瑩都係喺美國俄亥俄州立大學畢業，但佢就主修心理學，好似唔少富二代咁，喺加入碧桂園做事之前曾喺一間出名嘅國際投資銀行做嘢，喺○八年至加入碧桂園做主席助理，年紀輕輕就已獲委以重任。
楊國強嘅家族觀念有幾重？睇番碧桂園二○一○年嘅年報都唔難發現，單睇執行董事，加埋楊子瑩之後，公司一共有十個執董，當中有五位係「楊家將」，包括楊國強、楊惠妍，仲有楊子瑩嘅堂阿哥楊志成、楊永潮。
楊國強嘅碧桂園家族管理色彩極鮮明。 （資料圖片）