政情：公醫踢走周一鑊搵范太傳聲

煲呔曾政府進入倒數等收工階段，各方亦似乎對呢個政府冇乜期望，紛紛將注意力轉移到疑似下任特首候選人身上。近期頻頻向食物及衞生局局長周一鑊同醫管局爭取改善醫生工作環境嘅公共醫療醫生協會（PDA），今個月中就請咗其中一名疑似特首候選人范徐麗泰做周年聚餐嘉賓，係咪反映連醫生都已經對現屆政府死心呢？

PDA前會長何栢良話，其實佢哋每年會員大會兼周年聚餐，除例必請食物及衞生局局長出席外，亦會邀請唔同政經界人士，等佢哋同公院醫生交流吓睇法。佢否認今次邀請范太同佢係疑似下任特首候選人有關，話早個幾月前已開始邀約對方，嗰陣范太都仲未發表兩個月後考慮選唔選特首嘅言論，又話○八年范太卸任立法會主席，PDA都有請佢出席聚餐喎！

不過，何醫生都好坦白咁講，向醫管局爭取改善醫生待遇同工時咁多年，當局都一直冇聲氣，搵啲較高級人士，話唔定佢哋嘅意見比較有機會「直達天庭」咁話，范太位居全國人大常委，絕對係適合人選喎。佢話事前冇特別同范太傾聚餐當晚要講啲乜，由對方自由發揮就得啦。咁對另外兩位疑似特首候選人唐唐同CY梁振英又點睇呢？何醫生話PDA立場好開放，過多幾個月如果有人表明參選，到時會再嘗試約各位參選人見面，表達公院醫生訴求。

張瑪莉教路重塑醫生形象

咁即係話，周一鑊將個波拋畀醫管局之後，早前又發表「斤斤計較」論，辣㷫班醫護人員叫佢下台，靠佢蛇都死啦！

此外，PDA今年仲請到前香港小姐冠軍、依家從事市場推廣嘅Mary張瑪莉，何醫生笑言公院醫生近年形象低落，仲成日畀人抹黑係斤斤計較同為錢抗爭，希望到時Mary可以教番佢哋兩招，等佢哋重塑醫生形象咁話。