政情：搞搞政：何君堯揶揄政府政策渣
早前煲呔曾就港珠澳大橋環評司法覆核批評有政黨濫用司法制度，法律界人士都睇唔過眼，反駁佢嘅人一浪接一浪。新任律師會會長何君堯尋日接受電台訪問時話，市民提出司法覆核係反映對行政措施不滿，不平則鳴，然而司法覆核只能治標，不能治本，解鈴還須繫鈴人，「政策唔完善的地方應該在政策方面改善」。言下之意，即係話政府唔想人去司法覆核，不如搞好政府嘅政策。
佢又話本港每年通常有一百宗司法覆核案件，近年個案增加係因為社會有需求，而司法機制已經設有門檻防止市民濫用，「無理取鬧都上唔到法庭」，所以已經有晒保障。
何君堯早前提出修改鄉委會會章，令新界鄉議局主席劉皇發無法連任屯門鄉委會主席，何君堯話上年十月做村長，再入主鄉委會，依家做埋律師會會長，仲話有興趣參加明年立法會選舉添。
設計圖片