政情：疑似特首候選人同場鬥快閃
全國人大常委范徐麗泰、政務司司長唐唐同行政會議召集人CY梁振英等三名疑似特首候選人，尋日齊齊出席辛亥革命百周年展覽活動，難得同場，但佢哋交流近乎零。
喺活動開始前，唐唐同CY應大家要求握手合照，雖然雙方都伸出友誼之手，但表情就鬼咁尷尬，影完相仲即時分開走，范太就更加行到冇雷公咁遠，要拉三個人一齊影相都好難，終於咪就係依家見報嘅幾十人大合照囉。
到展覽開幕典禮結束，三個都極速閃人，唐唐同CY即時逃離現場。范太就畀記者包圍住，雖然佢話唔會再講嘢，因為佢講乜嘢都畀人話佢想選特首，佢費事誤導人，叫大家兩個月後佢「玩完」再問，但被問到日前佢講二十三條立法係咪想取悅中央，佢就話一早已講過呢個話題，佢亦無話要政府立即為二十三條立法，立唔立法由現屆政府決定。
三名疑似特首候選人各據一方，同場無咩交流。