政情：九西轉戰九東任亮憲狙擊陶君行？
早前捲入非禮強姦案嘅「維園阿哥」任亮憲成功甩難後，不但重返發迹地《城市論壇》，日前更參加人民力量搞嘅退修營，訓練一班有意參選嘅成員點樣辯論。
喺人民力量仲未有一官半職嘅佢仲自爆獲黨委以重任，負責「統戰」人民力量成員最少嘅九龍東。佢話自己雖然有做開地區工作，但都以九西為主，今次被調派九東，就要重頭做起，但唔會畀自己太大壓力喎。
九東一直係陶君行嘅盤據點，任亮憲進軍九東，會否以狙擊阿陶嚟打響聲勢？任亮憲對此笑而不答，直言人民力量對會否狙擊社記未有定案。若果二人開拖，大家就有好戲睇嘞！
