政情:「嘥錢聯」濫用公帑做人情

早前建仔幾個立法會議員被揭發間屋有僭建物,旋即被嘲為「僭建聯」,依家又畀人叫「嘥錢聯」。點解?

每個財政年度,每位議員都有一筆大概一百六十五萬嘅辦事處營運開支,佢哋用啲錢嚟做乜呢?黨主席譚耀宗喺舊年九月、即上年度最後一個月仲有四十八萬元撥款餘額,竟然一次過狂印一百萬個兔年利是封同四萬個磨沙年曆,用嚟派街坊。該黨嘅劉江華過去兩個年度用咗逾六位數字嘅錢,整咗共五萬個環保袋同圓扇形尼龍袋。

譚耀宗話畀人老屈

譚耀宗尋日喺一個活動時不停咁話畀人「老屈」,解釋一疊利是封有二十個,印一百萬個其實得五萬疊,新界東有二百萬人,「五萬人攞到都好合理啫!冇乜咁大罪過吖!」雖然佢承認舊年九月單月用咗近四十萬元,但強調做法符合所有立法會守則,而印利是封同年曆只用咗二十三萬元,唔可以同其他開支加埋一齊講。

有報道話佢有大量利是封派唔出,佢解釋話某報記者「設局」,打電話去佢辦事處訛稱屋企辦喜事,職員見擁躉叫到,先千方百計搵幾個畀佢。佢話報道係誤導同有偏見,至於會唔會投訴嗰張報紙呀?佢話咩行動都唔排除,叫對方「收斂下」喎。

劉江華就話做袋實為配合膠袋稅鼓勵市民用環保袋,新界東一百七十萬人口,整袋唔算多,呢啲宣傳品係同選民溝通方式之一;克勤仔就自嘲知名度唔高,所以要印多啲工作報告,等人知佢係乜水,而佢承認有職員計錯重量,所以用多咗幾萬蚊郵費。

建仔用呢筆錢嚟做啲令人意想不到嘅嘢,雖然冇違規,但政黨做啲咁嘅事,難免畀人質疑。

「Money18免費即秒股票報價網站」現推出8升級功能,財經資訊,實時實發!