政情：靚女有着數政黨競栽花

政壇向來都係男士盤據之地，但隨着政黨青黃不接，各黨都使出渾身解數吸納新血，當中唔少仲係見得吓人嘅年輕少艾，好似有富貴黨「美女玄學家」之稱嘅方亮瑜、「社民連張栢芝」嘅「波波」林采薇、建仔新星呂迪明、白鴿黨「小百合」鄭莉莉同港姐出身嘅選民力量成員Erica袁彌明等，幾乎各黨都有黨花。雖然佢哋唔少都資歷尚淺，未能趕得及出戰年尾嘅區議會選舉，但都深受黨重用，到時派佢哋出嚟亮相博見報。莫非依家參政，靚女係先決條件？

喺呢個講究男女平等嘅社會上，從政已非男性專利，女人從政，甚至可抓緊更多眼球。舊年高調宣布加入「選民力量」、聲稱要白鴿黨「票債票償」嘅Erica，自涉獵政治後繼續成為傳媒焦點。坊間有傳佢嚟緊區選將單挑白鴿黨黃碧雲同專業會議嘅梁美芬，年輕貌美喺選舉上有冇優勢，睇吓呢場硬仗嘅賽果就可略知一二。

出力幫黨爭見報率

唔少靚女政壇新星亦正喺地區磨拳擦掌，期望喺區選一爭長短。據聞本為玄學家嘅方亮瑜，近日密密到港島做地區工作；另外，外貌有幾分似Stephy嘅呂迪明亦頻頻到梨木樹見街坊。

早前雙雙捲入任亮憲桃色醜聞、被指曾被任力追嘅鄭莉莉同波波，雖然一直都冇表態有意出選，只係喺黨內擔當支援角色，但卻不時以佢哋嘅美貌幫黨爭取見報率。鄭莉莉幾乎被認定為黨嘅御用model，白鴿黨或民陣每每推出新T-shirt，必定會搵佢做model影番輯宣傳照，增加市民嘅購買欲；唔少人更因為想認識酷似張栢芝嘅波波，而出席社民連嘅示威行動，甚至遞紙加入社民連，美女魔力絕不能小覷。

所以話，靚女去到邊都有着數，政壇亦唔例外。睇呢個形勢，選舉隨時變選美大會！