政情：港珠澳橋環評官司何建宗籲平常心看待

港珠澳大橋環評官司引發政府高層與政黨罵戰後，做過環境諮詢委員會委員及轄下嘅環境影響評估小組副主席嘅公開大學科技學院院長何建宗呼籲，應以平常心面對市民提出嘅司法覆核，又認為冇必要將官司擴大成政治事件。

當年有份協助草擬環境影響評估條例嘅何建宗話，今次爆大鑊同「有香港特色的環境影響評估制度」有關，制度嘅核心係「防患於未然」，但本港發展速度「舉世無雙」，相比北美地方做一次環評搞成六、七年，香港人未必收貨，所以當初訂立制度嘅時候，無全盤照抄外國嗰套，原本嘅「公眾參與」亦惟有變成「公眾諮詢」。

何又話，美國當年推出環評制度時，也曾經歷十多年不斷有人提出司法覆核嘅「陣痛」，雖然經濟代價好沉重，但當所有法律觀點釐清後，環評便逐漸走上坦順嘅道路。相較煲呔曾鬧人濫用司法程序去阻撓基建工程嘅言論，何建宗嘅言論真係一矢中的。