政情：龐盧淑燕買陳振聰遊艇
千億遺產案主角陳振聰日前被控偽造及使用虛假龔如心○六年遺囑後，前日提堂後獲准保釋，但因為唔夠錢畀，結果要撲水「埋單」。呢單官司須投入大量金錢，年前已傳出佢賤賣資產籌錢嘅消息，私人玩具如飛機、豪華遊艇同名車等都要割愛求售，我哋八到，艘豪華遊艇據傳賣咗畀保良局主席龐盧淑燕嘅家人。
龐盧淑燕前日偕丈夫龐國本出席一項慈善活動時，被問及年前購買陳振聰艘遊艇一事，佢直認不諱，話艘遊艇係兩年前購入。聽聞價錢筍到極，但龐太唔肯透露幾多錢，淨係話艘船啱佢心水，得閒同家人出海遊吓船河，同幫陳振聰籌錢打官司無任何關係喎。
端午節將至，龐太兒孫滿堂，唔知會唔會一家大細出海玩吓呢？
龐盧淑燕承認兩年前購入陳振聰一艘豪華遊艇，右為其丈夫龐國本。