政情：搞搞政：周澄暗寸放生維園阿哥

「維園阿哥」任亮憲捲入非禮強姦指控，早前獲警方不予起訴，維園阿哥鬆晒，佢嘅前女友周澄尋日都贈佢兩句︰「我就覺得有做就有做，冇做就冇做囉！」周澄仲話，全世界呢啲案件都好難有證據去保障女事主，好難去證明有強姦或者有非禮，希望啲女事主過得好啲！

有民主小女神之稱嘅周澄同維園阿哥有過一段情，今次佢先話唔方便再評論，跟住發言又句句都從女性角度出發，言下之意係暗寸警方證據不足，先至放生任亮憲，定係畀維園阿哥一個溫馨提示？你哋自己諗喇。

去咗菲律賓實習半年嘅周澄今個月初返咗香港，尋日就出席由香港傑出學生協會青年論壇。早前有傳周澄會加入社民連，佢就話依家喺社民連秘書處做兼職，只係過渡性質，一搵到工就會走人，所以唔會加入社民連，亦對政黨及從政冇興趣。講番個論壇，尋日輪到公民黨黨魁梁家傑發言時，周澄喺枱上神色凝重，點知枱底就用右腳幫左腳捽腳趾，睇落都幾搞笑。