政情：孭責未請辭孫公囉囉攣

教育局局長孫明揚被踢爆居所有僭建後，成為僭建風暴嘅風眼，連日來更被人追問會唔會為事件問責下台。政府高官對呢個問題採取迴避態度，孫公尋日出席一個活動後，忽然鄭重咁對在場傳媒發言，重申會對其屋企存在僭建物事件負上全責及承擔所有後果。孫公呢番話引起唔少揣測，政圈更有傳佢已經請辭，雖然佢嘅新聞秘書即刻否認，不過，縱橫官場三十幾年嘅孫公近日表現難免畀人囉囉攣嘅感覺！

孫公尋日出席童軍總會模範童軍頒獎禮，自從被踢爆主管規劃地政時僭建兼罔顧屋宇署釘契之後，唔少立法會議員要求佢辭職，佢去到邊亦成為焦點，所以尋日好多傳媒在場等佢。活動完結之後，孫公未待傳媒發問，已率先「表白」︰「我想藉呢個機會重申，我會對於呢件事（僭建事件）負上全部責任，同埋承擔所有後果。」

講完之後，孫公就旋風式離開。消息人士話，孫公尋日主動發言只係唔想傳媒撲個空，仲話佢嘅言論只係重申日前嘅立場。但明眼人都睇到，孫公日前只係話會「承擔」，事隔三日升級為「負全責承擔後果」，政治問責嘅味道已經好濃。政圈近日亦不時有傳，身體欠佳、要經常洗腎嘅孫公對官場並唔留戀，舊年年尾以來走就盤旋喺佢心中，今次係順水推舟、定係逆水行舟，囉囉攣之後就有定論。

李少光：畀人查都無問題

呢場僭建風暴威力咁大，官場人人自危，手頭持有沙田碧濤花園四個單位嘅保安局局長李少光，前晚出席香港總商會一百五十周年晚宴時，對僭建呢個敏感問題一啲都唔迴避，被問及有冇畀人「查家宅」時，光哥氣定神閒笑笑口話︰「冇，我身家清白，畀人查都冇問題！」