政情：曾雪麗撈過界教餐桌禮儀
待人接物之道，除咗以禮相待外，餐桌禮儀更不可忽視，仲要從小培養。著名芭蕾舞學校校長曾雪麗早前同推出FLEECE童裝系列的服裝品牌Brooks Brother合作，舉辦兒童餐桌禮儀課程，由佢親自教授現場超過四十位小朋友，透過沙律、主菜同甜品等四道菜式來學習禮儀。當中選出表現最好嘅四位小紳士同小淑女以表揚，所有完成課程嘅小朋友仲獲頒證書。
曾雪麗話：「我叫小朋友腰要挺直，唔好將匙羹當雪條咁舔，亦都唔好喺張枱托手㬹，就算跌咗餐具落地，可以勞煩叫哥哥姐姐執，唔好自己捐落枱底。今次個個小朋友都做得好好，又着到好似紳士淑女咁，答問題好踴躍。」
曾雪麗（右二）教餐桌禮儀，小紳士小淑女獲益良多。