政情：曾智明開拓時尚風格新路線
金利來集團副主席Ricky尋日喺集團股東周年大會時透露，佢哋會分拆多一條走時尚風格嘅高級路線，專程喺法國聘請設計師來港打造新包裝，以全新形象示人，但鑑於集團發展至今有咁大規模，都多得一班忠實擁躉，所以佢話唔會放棄舊顧客，亦唔會忽略年輕一代嘅新顧客。
佢向來鍾意自己做模特兒演繹自家品牌，佢坦言仲未有「老闆」嘅肥胖身形，所以着起一啲靚質地恤衫時，腰位都有啲鬆動，但現時新設計剪裁會略為修身，所以令佢着起嚟比較啱身。
依家通脹勁升，佢反而唔係好驚，事關佢年頭買咗幾百萬元貂鼠毛，轉頭已經升值，所以佢好鍾意做內地巿場，因為利潤可以畀到佢哋發展空間喎！
曾智明穿着自家金利來新系列服裝，啱身又好睇。