政情：搞搞政：巴士阿叔騎呢政綱選特首

多名疑似特首候選人近日各有動作，但大家似乎睇漏咗一個特別嘅候選人，就係以「你有壓力，我有壓力」名句紅爆YouTube嘅「巴士阿叔」陳乙東。佢尋日率先宣布參選二○一二年特首選舉，仲發表「治港藍圖」，包括建議增建居屋、十五年免費教育、向每名市民派發四十萬元現金股等，唔知其他幾位疑似特首候選人有冇畀佢嚇親呢？

巴士阿叔自九七年起已先後參加四次特首選舉同補選，但因為攞唔夠提名而失去參選資格，今次佢咁早宣布參選，選舉事務處可以開始計佢嘅選舉經費。不過，佢有備而來，事關佢已經預咗一千萬元選舉經費，開支包含用三百萬元喺加拿大租用噴射客機作為私人空中座駕、一百二十萬元租用選舉辦公室等，所有資金來自佢海外嘅石油生意資產喎。

佢嘅「治港藍圖」亦相當精彩，除咗上述提過嘅政綱外，佢仲建議道路命名拍賣、設立紅燈區同賭場等，甚至話要喺天橋同架空公路起公屋，認真有創意。