政情：張文血腥相嚇人戒食翅
潮流興環保，唔少人都響應拒食魚翅，還鯊魚寶貴生命。立法會議員張文光亦響應號召，尋日傳閱咗一批相片畀其他議員睇，呢批相稱得上係非常殘忍兼血腥，接近兒童不宜程度，相信睇完嘅人見到魚翅都冇晒胃口，張文呢招靠嚇確係使得。
成輯血腥相有成四十張咁多，全部來自一本叫做《人鯊誌》嘅書，相片道出一塊魚翅由誕生至變成佳餚上枱嘅整個過程。當大家睇完喺海裏面自由自在地游來游去嘅鯊魚，畀人捉咗上岸後一條條放喺地下等劏，血流成河，或被人釣咗上船、割咗塊魚鰭之後掉番落海嗰種苦況，相信大家都會加入戒食魚翅行列。
