政情：林鄭又玩親疏筍位唔益泛民

煲呔曾做人做事都親疏有別，新近又爆多單，就係前政府資訊科技總監葛輝爆大鑊，喺交畀立法會陳述書中，點名指財爺鬍鬚曾早就欽點咗「上網學習支援計劃」嘅執行機構，又引述煲呔曾愛將、商務及經濟發展局常任秘書長謝曼怡嘅說話，指安排係由「比財政司司長高級」官員下達的指令。言下之意，暗示係煲呔曾益自己友。

正所謂上樑不正下樑歪，呢種歪風席捲官場，連煲呔曾口中所講「好打得」嘅發展局局長林鄭月娥都有樣學樣。點解咁講？睇下尋日發展局公布成立嘅九龍城市區更新地區諮詢平台嗰份名單就一清二楚喇！

諮詢平台全選建制派

九龍城市區更新地區諮詢平台主席係香港工程師學會前會長黃澤恩，其他十四位非官方代表中，除咗多名專業人士外，有四名係九龍城區議會議員，全部嚟自建制派，建仔嘅就有蕭婉嫦同尹才榜，富貴黨就有何顯明，剩低嗰位係九龍社團聯會理事長王惠貞，但一個泛民主派都冇。

老實講，諮詢平台工作同當區居民息息相關，民協同白鴿黨好歹都有幾名九龍城區議員，民選議員更加有其代表性，竟然都被林鄭拒諸門外。再者，如果陰謀啲諗，泛民有份參與，萬一將來出台嘅政策惹來批評，都多啲人一齊負責吖！唔通林鄭預期所有政策都有好冇壞，所有人都收貨？又抑或係呢個平台嘅成員組合，確保政府拋出嚟嘅嘢都唔say no？咁就只有林鄭自己先知嘞。

但可以肯定嘅係，林鄭咁樣親疏有別法，睇怕將來諮詢完有乜政策要出台嘅時候，泛民唔反對兼搞對抗都幾難，結果林鄭又係自找麻煩。