政情：柳傳志勁sell聯想樂Pad

蘋果公司嘅iPhone同iPad已攻陷咗市場，內地呢舊肥豬肉，係好多電腦製造商嘅目標。眼見內地移動互聯網滲透率愈嚟愈高，內地個人電腦生產商大佬聯想馬上推出「樂Phone」應戰，而早喺三月份，針對平板電腦嘅「樂Pad」亦已推出，雖然管理層冇講依家反應係點，但聯想主席柳傳志就話自己想向公司買1,000部「樂Pad」送畀人都買唔到喎！

聯想一眾管理層尋日勁sell呢部「樂Pad」，柳總話對呢部「樂Pad」非常之有信心，除咗發郵件同短訊外，仲可以連續咁寫字，唔單止呀，連依家好流行嘅game「殭屍大戰」，都可以用全中文！而CEO楊元慶sell「樂Pad」更有一手，猛話非常易用，好似佢爸爸，個幾禮拜至學識用mouse，學「樂Pad」呢，十幾分鐘就識用嘞，連佢喺外國幫佢湊仔嘅媽咪，都會用嚟睇CCTV添！