政情：搞搞政：最低工資計算機 擾民代表作

政府想利用開設facebook專頁「上亞厘畢道」宣傳吓政策同做吓政治騷，然而政府施政搞到天怒人怨，曾班子民望又低處未算低，所以每當佢哋上載新資料上facebook，唔係畀人鬧爆，就係畀人惡搞。

勞工處日前推出「最低工資參考計算機」，畀市民喺網上填寫資料，從而計算自己嘅薪酬合唔合乎法例要求。政府官員即時將呢項「傑作」上載至facebook，期望博得掌聲，但事與願違，唔少網友都炮轟要輸入嘅資料太多，喺度浪費市民時間；亦有人指攞緊最低工資嘅市民大部分都唔識上網，質疑政府多此一舉。

勞工及福利局局長張建宗處理最低工資指引搞到一鑊泡，依家又搞個咁複雜嘅計算機出嚟，利民變咗擾民，當然畀人狂炳啦！

不過，最多人鬧爆嘅並唔係部計算機，而係政府本身。班網民一人一句，狠批政府施政失誤，搞到民不聊生，整乜計算機都冇用。政府係咪應檢討一下，何解本來可以搶分嘅嘢，最後都會畀人鬧爆呢？