政情：王忠桐話等住煲呔曾落台
煲呔曾施政樣樣都與民為敵，真係佛都有火。東華三院前主席、坐擁億萬元資產嘅上市公司王氏港建主席王忠桐，眼見政府施政每況愈下，搞到市民怨聲載道，都睇唔過眼。上禮拜佢呻過通脹猛如虎，前日佢繼續炮轟一再修改嘅財政預算案，話提高汽車首次登記稅百分之十五嘅政策，被嘈多兩嘈就跪低讓步，認真冇用。
佢話鋒一轉，話唔相信呢啲咁廢嘅財政預算案內容係財政司司長一手搞出嚟，如果特首唔點頭冇可能推行。佢仲話煲呔曾好小器，如果識向各黨派伸出友誼之手，就唔使搞到依家乜政策都遭反對，搞到咁嘅處境確係自己攞嚟衰，佢語重心長咁話：「快啲等佢落台算啦！」