SUN角度：老闆炒人被斥無良 勞資關係劍拔弩張

城市大學專業進修學院學術統籌宋立功指出，最低工資實施後，勞資雙方關係變得緊張，「例如老闆要求加班，打工仔會要求計番時薪，老闆為控制成本，咪要員工喺八小時內完成工作囉，唔合要求嘅員工甚至會被開除。雙方關係劍拔弩張，僱主好小嘢都會被放大，甚至被標貼為無良。」

落實標準工時火上加油

雖然勞工及福利局局長張建宗指明年會商討標準工時問題，但宋認為，若進一步落實標準工時，勞資關係將受到更大考驗。

宋立功說：「現時惟有雙方互讓互諒，政府亦要檢討，係咪要咁快落實標準工時，定係畀多幾年時間雙方適應。」

「實施最低工資後，最唔開心係被社會標籤為無良僱主！」經營網吧生意近十年的陳龍盛，深感最低工資令社會分化，彷彿老闆都是剝削員工的吸血鬼，「我唔反對最低工資，亦覺得係好事，但政府由立法到實施，都冇預計到樓市升得咁緊要！我曾要求業主減租，但事實係你唔租，大把人等住租。」

陳龍盛說：「租金只升不跌，我哋經營真係好吃力！」