預算案宣布調高汽車首次登記稅後，引起汽車界不滿，政府堅持推行，搞到業界同消費者亂晒大龍後，日前終於喺民意同政黨壓力下跪低，拋出讓步方案，包括寬免加車稅前已落訂買新車嘅稅收，並安排退稅，令唔少政商界名人受惠。當中回水最多嘅就係金至尊主席黃英豪，佢年初透過公司訂咗部五百幾萬元嘅賓利（Bentley）豪華房車，依家可回水三十萬元車稅，佢話未諗筆錢點使好。
「五散人」之一、會計界立法會議員陳茂波都係準車主，佢都慳番十萬元車稅，話一於捐去做善事，幫助貧苦大眾。