政情：阿Ron開行會跣到跪
近日天陰陰，一班行會成員尋日去政府總部開會時，唔知係咪雲石地板好濕滑，身兼港交所主席嘅夏佳理（Ron）行入門口時，竟然成個人「嘭」一聲跪咗落地，七十二歲嘅阿Ron咁樣跌，真係好傷噃！前日恒生指數先跌咗四百幾點，舵手阿Ron隔日又一跌，有乜玄機呢？
阿Ron開會前十分鐘已抵達政府總部，但啱啱踏入雲石地板就跣一跣，成個人跪低咗，幾個保安見狀即刻上前扶起佢，阿Ron起番身後裝作冇事咁行咗上去開會。不過，跟住見佢拐吓拐吓咁行入會議室，真係令人擔心。
開完會落嚟，平時健步如飛嘅阿Ron都要捉實樓梯扶手，一步一步好小心咁行。問阿Ron膝頭仲痛唔痛，佢就做咗個手勢表示有少少痛，話只係行得快、地下濕滑至跌親，已經冇事，唔使睇醫生檢查。
阿Ron行到雲石地板時跣到跪低。
阿Ron跌親後，落樓梯離開時扶到實一實。