政情：搞搞政：劉夢熊指點任總選特首

疑似特首參選人嘅消息日日傳，鐵三角亦成為城中熱話。全國政協委員劉夢熊尋日出席電台節目時話三人各有特點，佢就認為市民諗嘢時「眼光可以開闊啲」，可以跳出框框諗吓其他人。邊個呢？佢大手一指，咪係中國金融學會執行副會長任志剛囉！

劉夢熊話，政務司司長唐唐冇魄力，行政會議召集人梁振英有魄力，但人緣方面就有改善空間，至於全國人大常委范徐麗泰雖然民望高，但都要考慮能力、年紀、身體狀況等。所以，佢話鋒一轉，話任總做金管局時，喺立法會面對班議員質詢都仲可以攞支筆篤篤篤咁有氣派，所以佢都係另一個選擇。

近排好多人都開列特首條件，劉夢熊就認為做特首要有三大條件，一係要完整、準確咁執行一國兩制；二係要捍衞國家主權同香港核心價值；三就係要有使命感，要完成二十三條立法，為雙普選掃走「地雷」，解決樓價同年輕人社會流動性等問題。