政情：范太列下任特首三挑戰
高調表明要「玩多兩個月」至考慮係咪競逐下屆特首嘅全國人大常委范徐麗泰，早喺上個月接受珠海學院新聞系學生專訪時，已大談下屆特首將面對嘅三個挑戰，難怪好多人都話范太兩個月後嘅答案幾乎唔使估。
范太話，下屆特首三大工作包括訂立二○一六年立法會同二○一七年特首選舉方案，其次係要為二十三條立法，第三係要為政府定位。政府當年力推二十三條，激發五十萬人上街，但范太講到二十三條卻毫無忌諱咁話：「香港十五年都冇做，澳門已經做了。」認為下屆特首有責任為二十三條立法，可算相當勇猛。
范太仲話，政府要為人民服務，絕對唔能夠脫離群眾，更唔可以只做一啲自以為係人民需要嘅事，須以民為本咁話，無論邊一屆政府，都應該幫助弱勢社群，令佢哋覺得有希望。