政情：葉劉人氣爆升跑贏立會女將

政圈冇焦點，本地政治人物知名度卻悄悄大執位。港大尋日公布每半年舉行一次嘅俗稱十大政治人物（市民最熟悉政治人物）調查，結果顯示，今年組建新民黨嘅葉劉淑儀人氣忽然急升，一改舊年跌出十大嘅命運，仲衝上去攞季軍添，係最叻嘅政圈女將。有人升就梗有人跌，公文袋嘅余若薇、白鴿黨劉慧卿就慘被拋出十大，人氣跌watt。

李卓人禍不單行

做過高官嘅葉劉舊年一直冇入十大，今年初組黨之後，知名度忽然急升，反而立法會兩大泛民女跑手就冇乜後勁，劉慧卿由半年前調查嘅第五位被拋至第十一位，余若薇更由半年前嘅第十位跌至第十三位。

女將大執位外，人民力量嘅黃毓民今次都打入十大，仲即刻攞咗第五名。而早前因為最低工資民望插水嘅職工盟李卓人再次中招，半年前仲喺十大排名第八嘅佢，今次調查就跌到第十二位，再嘗人氣同支持度齊跌嘅苦果。

呢個調查訪問咗過千個市民，經常亮相嘅高官一般都排名幾高，不過，年初炮製咗史上最廢預算案嘅財爺鬍鬚曾就僅僅排名第十；早前講過「玩多兩個月」至考慮係咪選特首嘅全國人大常委范徐麗泰，今次排名第九，同過往排名冇乜大變動。反觀另一疑似特首候選人、行政會議召集人梁振英就十大不入，搞咁多嘢都係冇市民記得，真係要好好檢討吓喇！