政情：搞搞政：天文台網誌脫稿拍烏蠅

喺一眾官員中，以近屆幾位天文台台長最勤力寫網誌，好似「黑英」林超英同李本瀅，聽講唔少網友更因為睇咗佢哋嘅大作而對天文產生興趣添！

之不過，天文台呢個咁好嘅「德政」，喺新任台長岑智明上任後竟然維持唔到落去。睇番佢喺上個月十四號寫嘅首篇網誌，話因為有愈嚟愈多同事友好支持，以及提供文稿，所以決定將「台長網誌」改名做「天文台網誌」，以表達呢個網誌係成個天文台共同參與同擁有嘅。

新台長嘅用意本來冇得彈，只不過事實證明寫網誌嘅天文台職員唔係咁多，一啲都唔踴躍，簡直拍晒烏蠅呀！網誌最新一篇文章嘅發表日期係上個月二十一號，足足成個月前，直至尋日都冇新料，似乎有啲虎頭蛇尾喎！

岑智明將網誌嘅性質改咗，但更新又唔見得比以往頻密，唔通佢咁做嘅目的其實唔係開放平台，而只係藉機偷懶？呢個真係佢自己先知嘞。